MPCC-in IAF hnenah Lengpui Airport hlan lo turin Mizoram sorkar an ngen; Sum chawi belh a tam tham hle - MPCC Sr. VP

MPCC Vigilance Cell chuan nimin khan Aizawl Press Club-ah thuthar thehdarhtute kawmin, Indian Air Force (IAF) hnenah Lengpui Airport hlan lo turin Mizoram sorkar an ngen. MPCC sr. vice president Lalnunmawia Chuaungo chuan Lengpui Airport enkawlnaah Mizoram sorkarin sum a chawi belh hnem thu a sawi.

MPCC Sr. Vice President chuan, Lengpui Airport enkawl chungchang zirchiang a, rawtna siam tura Mizoram sorkarin a din working committee chuan Chief Minister hnenah rawtna an thehlut tawh tih chanchinbuah an hmuh thu sawiin, "Lengpui Airport tih changtlun hna thawk tur leh enkawl turin IAF chauh beisei tur an hmu tih pawh report a awm," a ti.

Lengpui Airport chu tih­changtlun a ngai nasa hle tih sawiin Lalnunmawia Chuaungo chuan, "Lengpui Airport hi chu kum tam tak sum hloh char charna tur a nih avangin private company tan beisei tur awm miah lo a ni. Kan state ang sum leh paia harsa tak tan tih theih a ni lo bawk," a ti a, sorkar laipui ringa airport tihchangtlun a ngaih thu a sawi.

Lalnunmawia chuan Lengpui Airport enkawlah duhthlan tur pathum a awm thu sawiin, "Pakhat chu central sorkar aṭanga sum kan chan ve eng emaw zat pawh pen a, zawi zawia tih hmasawnna hna thawh chhunzawm a ni. He duhthlanna hnuaiah hi chuan airport tihchangtlun hna awmze nei thama thawh theih a ni lo," a ti.

Duhthlan tur dang leh chu inremna fel tak nena Airport Authority of India (AAI) hnena hlan a nih thu sawiin Lalnunmawia chuan, "AAI hi commercial airport leh a kaihhnawiha thiamna sang ber leh tawnhriat nei ṭha ber, central sorkar behchhana sum leh pai pawh harsa em em loa ruahman thei tur an ni," a ti a, AAI kuta hlan chu Mizoramin a ṭhatpui ber tur a nih thu a sawi.

MPCC Sr. Vice President sawi danin, Lengpui Airport tih hmasawnna atan cheng vbc. za tam tak sen bakah a enkawlna sum tam tak hloh tur a nih avangin AAI-in LengpuiA irport lak hi an chak lem lo, political level-a chinfel ngai a ni.

Duhthlan tur dang leh chu IAF kuta hlan emaw in enkawl ṭawm a ni. Defence Ministry aṭanga sum ruahmanna awma airport tihchangtlun hna eng emaw chen a tih theih ang.

IAF mamawh ngaih pawimawh hmasak a ni dawn tih hai rual a ni lo tih sawiin MPCC Sr. VP chuan, "IAF leh Zoram mipuite mamawh in perhsan tak tak a awm dawn tih a chiang reng. Lengpui Airport ram zimte acre 570 bawr vel chauh a ni. IAF hman bik tura ram eng emaw zat sah thlak chu tih chi a ni hauh lo ang," a ti a, IAF kutah airport hlan lo turin Mizoram sorkar a ngen.

Lalnunmawia Chuaungo chuan Lengpui Airport enkawlna atan Mizoram sorkarin kum khatah pawisa a hloh hnem thu sawiin, "Kum 2022-2023 chhung khan airport enkawlna atan cheng nuai 1,500 vel sen a nih laiin, hemi hun chhung vek hian airport aṭangin cheng nuai 613 chauh lakluh a ni," a ti a, CRPF-te hlawh ringawt pawh a tam tham thu a sawi.