Zirtirtu indaih lohna siam rem tura hmalak mek a ni - ZPM party

ZPM party chuan nimin khan thuchhuah siamin, Education minister Dr Vanlalthlana hmalaknain Mizorama zirna siamṭhat hna thawh mek a nih thu leh zirtirtu indaih lohna siam rem tura hmalak mek a nih thu an tarlang.

ZPM chuan, Mizoram zirna siamṭhat hna thawh mek a nih thu sawiin, "Tun hnaiah casual teacher ṭhahnem tak high school, middle school leh primary school-a zirtirtu indaih lohna phuhru tura lak an ni a, sikul chei ṭhat ngai leh sak ṭhat ngaite theihtawpin sorkarin a thuam ṭha mek," an ti.

Zirna siamṭha turin a tahtawl tê têa hmalak a ngaih avangin college zirtirtute indaih lohna siam rem turin zir chian mek a nih thu sawiin chuan, "Champhai College-a zirtirtu indaih lohna, sorkar hmasa hun laia MZP Headquarters, Champhai hruaitute'n an lo thlen tawh chu tunlai hian ngènngáwl zawkin sorkar tharah beiseina sang tak neiin an duh leh mamawhnate Education Minister hnenah an thlen leh mek," an ti a, zirna ṭhatna tura Champhai MZP ṭhahnemngaihna an hriathiampui thu an tarlang.

ZPM party chuan, Mizorama college hrang hranga zirtirtu indaih lohna rualkhai zawka siam rem tura hmalak a hautak tih sawiin, "Fimkhur taka leh thuhnû dáwn taka kalpui ngai a nih avangin thâwk leh khatah tih zung zung theih a ni lo," an ti a; Education Minister hmalakna dawhthei taka ngaichâng a, mipui harsatna siam zawng leh zirna tiṭhuanawp zawnga hma la lo turin Champhai MZP an ngen a ni.

ZPM Ṭhalai pawhin thuchhuah siamin, ZPM kaihhruai sorkarah hun rei lo tê chhunga written test leh interview hmanga dik taka casual teacher lak an ni leh sorkar awm tawhte'n an tih ngam loh sikul leh zirlai mila zirtirtu sem rual mek a ni te, college zirtirtu sem rual hna thawh mek a nite chu lawmawm an tih thu an tarlang.