ULLAS Mela & Samagra Exhibition

Nimin khan Mizo High School Multipurpose Hall-ah ni hnih awh tur ULLAS Mela & Samagra Shiksha Exhibition buatsaih ṭan a ni a, School Education minister Dr Vanlalthlana'n a hawng.

Mela & Exhibition-ah hian stall 22 a awm a; ULLAS chungchang leh Mizoram zirlaite tana Samagra Shiksha hnathawh chi hrang hrang bakah, MBSE, SCERT leh PM Poshan hnathawh leh hmalaknate pho chhuah a ni.

Samagra Shiksha hnathawh zingah Sports & Physical Education, Skill Education, Inclusive Education, civil work, community mobilisation, Kala Utsav, Rangotsav, Band Academy, gender & equity, Vidhyanjali, ULLAS, PM SHRI, Foundational Literacy and Numeracy, NIPUN Bharat leh Media Cell hnathawhte entir a ni a; hnathawh chi hrang hrang pho chhuahte chu a sawifiahna ziaka an sem a ni bawk.

Minister Dr Vanlalthlana chuan, Samagra Shiksha hmalakna avangin zirna a kal thei tih sawiin, "An hmalakna hi a pawimawh hle. Mizoramah zirnain hma a sawn loh chuan khawtlangah zan mut theih loh khawpa buaina te, chhungkaw buainate a awm ṭhin a, khawtlang leh chhungkua hahdamna hi kan tuak chhuah a ngai a, chumi atan chuan zirtirtute leh officer-te ṭanho a ngai," a ti.

Dr Vanlalthlana chuan, zirna chungchanga ngaihdan leh rawtna neite chu thuneitute hnena thlen ṭhin turin a chah a; thawktute chu zirlaite innghahna an nih thu sawiin, sikul naupang an hmuhte chu anmahni chotu ni se a duh thu a sawi bawk.

School Education director leh Samagra Shiksha state project director Lalsangliana chuan, ULLAS-in a tum chu mi zawng zawngin ziak leh chhiar an thiam theihna atana hmalakna a nih thu a sawi a, "Mizoram sorkarin 100% ziak leh chhiar thei tura ṭan a lakna a ni," a ti.

ULLAS Mela & Samagra Shiksha Exhibition hi vawiinah chhunzawma zawh a ni ang.