PWD-in theihtawp kan chhuah - PWD Minister

PWD minister Vanlalhlana chuan, kawng chhiate siamṭha turin PWD-in theihtawp an chhuah thu a tarlang a; chutih rualin, duh anga chei hnûm theih a ni rih lo tih hriatpui turin mipui a ngen.

PWD Minister chuan, kumin hian kum dang zawng aiin fûr ruahtui a tam a, hmun tam takah kawng a chhia tih tarlangin, "Tun hnai kum dang zawng aiin kan tuar nasa niin a lang. Hmun tam takah lei a min avangin kawngpuite leiminin a hnawh a, kawng ṭhenkhat phei chu a bung/chhum hmawk hlawm. In leh lo chhe vek te, nunna chán hialte an awm a, a pawi tak zet a ni," a ti.

PWD chu khuarel chhiatna thleng tuar nasa ber pawl department a nih ṭhin thu tarlangin Minister chuan, "Tun ṭum chhiatnaah pawh kan kawng enkawlte him a ram a awm lo tluk a ni. Chhiatna hrang hrang thawm ṭha tura PWD-a ka thawhpuite - a tê ber aṭanga a hotu lian ber thlenga theihtawp an chhuahnaah lawmthu ka sawi," a ti a; zing hma tak aṭanga zan thlenga an thawh ṭhin thu te, Pathianni leh sorkar chawlh ní-ah pawh an thawh ṭhin thu te, PWD enkawl kawng ni lote pawh an siam ṭhin thute a tarlang.

Vanlalhlana chuan, Mizoram sorkar sum dinhmun a ṭhat loh avangin kawng chhia thawm ṭhat chu luhaithlak tak a nih thu a tarlang a, "PWD-in kan enkawl lai kawngte pawh duh angin kan chei hnûm thei hrih lo tih min hriatpui turin mipui ka ngen. Tunah hian leimin thenna ringawt pawh mi tam tak hnenah vaibelchhe tél tehmeuh leibá kan nei a ni," a ti.

PWD Minister chuan PWD-in khawl a hmansakte chu a hman man dawhthei taka lo nghak turin a ngen a; sorkar laipui leh Mizoram sorkara Finance enkawltute chu an harsatna a bik taka ngaihtuahsak turin a ngen. Kawng siam hna thawktute zai ngai a, zâwldawh taka leimin thiantute ṭawiawm a, dawhthei taka nghâk ṭhin turin mipui a ngen bawk.