KHAWTHLIR

Thisen pe

J Thankima College NSS leh Red Ribbon Club chuan nimin khan an college-ah blood donation camp an huaihawt a, Civil Hospital, Aizawl tan thisen unit 86 an pe a, petute mipa 60 leh hmeichhia 26 an ni.

Lawmpuina hlan

MZP General Headquarters chuan nimin khan MZP pisa conference hall-ah hnam pual zirlai pawl, college students' union, MZU Students' Council leh Students' Bar Council (SBC)-a hruaitu degree nei tharte lawmpuina hun an hmang. Zirlai pawl hruaitu degree nei thar mi 88 hnenah lawmpuina an hlan a ni.

Health care sawiho

Chief minister Lalduhoma hoin nimin khan a pisaah Health minister Lalrinpuii, adviser to CM TBC Lalvenchhunga leh Health department hotute'n Mizoram health care thar tur, Universal Health Care System kalpui dan tur ruahmanna hrang hrangte an sawiho bakah, hmalak zel dan turte an rêl a; chak taka bawhzui zel ṭha an ti.

Sangha chi sem

Fisheries department chuan August 5, 2024 khan Keifang leh Saitualah sangha chi - Indian Major Carps (IMC) leh Exotic Carp Fingerling an sem a, pakhat Re 1 man a ni. Saitual district-a khaw hrang hrangah a remchan dan ang zelin sangha chi sem hi kalpui tum a ni.

Fimkhur turin chah

Serchhip DC Paul L Khuma chuan nimin khan online hmanga inbumna chungchangah mipui hriattur a tichhuak a; hriatchian loh link click mai lo tur te, phone number leh mimal thil pawimawhte hriatchian loh hnenah pe mai mai lo turin a ngen.