West Saizawha thil thleng vangin MZP-in Chakma páwn chhuah an khap MSU-in Chakma House khàr an rél
September 3, Ningani zan khan Chakma ṭhalaite'n West Saizawh khuaah Mizo tlangval pakhat kut an thlak rawna sawi a ni. Hei vang hian MZP chuan Mizoram hmun hrang hrangah Chakma-te chu páwna chhuak lo turin an hriattir. MSU pawhin, pawi khawitute man kim an nih hma chuan Aizawla Chakma House chu khàr rih ni se, an ti.
Saizawh khuaa thil thleng avang hian MZP hruaitute chu nimin khan an ṭhukhawm a, hmalak dan tur an rél. MZP hruaitu eng emaw zat chu an president Vanlaltána hoin nimin khan Saizawh khua an pan nghal a ni.
MZP meeting chuan, Mizoram chhungah Chakma-te'n huangtau taka Mizote kut an thlak ngam chu an la na tak zet tih an tarlang a, "MZP chuan a
ṭul anga hma la nghalin, Chakma páwnchhuah khap nghal a ni," an ti.
MZP hian nimin khan hriattirna chhuahin, Mizoram hmun hrang hranga Chakma-te chu páwna an chhuah an khap thu an tarlang a, "MZP chuan thu leh awm hma chu an sahimna ngai pawimawh a, tu mah páwnchhuak lo turin a hriattir. Boruak a sosan zual lai chuan Chakma House pawhin mikhual thlen belh tawh rih lo turin a hriattir bawk," an ti. MZP thuchhuak chu kengkawh turin hmun hrang hranga MZP-te leh an thawhpui hnam pual zirlai pawlte an chah a ni.
MZP chuan, Mizoram chhungah Mizote'n vawi tam tak Chakma-te kut an lo tuar tawh thu leh dâwtin central lamah Mizote an hêk fo thu sawiin, "Mikhual huangtau, a ram mite zahna leh pawisakna nei miah lo Chakma-te chet dan hi MZP chuan ngawihbopui mai a tum tawh lo. Chakma chêtna hrang hrangte hi chhàn lêt a, rorelna dik an hmuh theih nana hmalak zel kan tum," an ti a; an hmalakna ṭawiawm turin Mizo mipui an sáwm a ni.
Mizo Students’ Union (MSU) pawhin nimin khan Saizawha thil thleng chungchanga hmalak dan tur an sawiho nghal a; Chakma ṭhalai rualte hi a rang thei ang bera man turin Mizoram sorkar kan phût a, man kim an nih hma chu Chakma House, Hunthar Venga mi chu khâr ni se, an ti.
Thil thleng chungchangah hian MSU sub-headquarters, Chawngte hmalaknain police-ah FIR thehluh a nih thu, MSU chuan an tarlang.
Mizoram Bawm Students Association (MBSA) pawhin thuchhuah siamin, Saizawh West khuaa thil thleng chu an dem thu leh, pawi khawihtute man chhuaha hrem ngei an phût thu an tarlang.
MBSA tarlan danin, September 3, 2020 tlai dar 7 velah Saizawh West H/S compound chhunga Chakma ṭhalaite'n ruihhlo an tih chu sikul hmun a nih avangin rem loh thu, Saizawh ṭhalai ṭhenkhatin an hrilh a, intihbuaina a awm lo. Chakma ṭhalaite chuan an ṭhiante punin, taxi leh bike eng emaw zat hmangin Saizawh an pan a, Chakma ṭhalai 30 velin Kraws Hmingthanga (Mamtea) chu an inah luhchilhin an sawisak rawn a, damdawi-inah dah luh a ni.
Thil thleng ngaihventu Savidge Larthankima pawh an inah kal chilh lehin, zanriah an ei lai chu an pawt chhuak a, kut an thlak hmain khawtlang hruaitute’n an dang hman a ni. Saizawh an chhuahsan dawnah nasa takin an inhrosa bawk niin an tarlang.
Hetih lai hian, MSU chuan nimin chhun thleng khan pawi khawihtua puh mi 12 chu police-te'n an man tawh tih an tarlang. Police-in an man tawhte chu Kamalanagar khaw mi vek an ni.
Police-in an man tawhte
1. Manod Chakma (21) s/o Lilamoy Chakma
2. Hriday Chakma (21) s/o Mohan Chakma
3. Shibil Chakma (21)
4. Mongola Chakma (20) s/o Juddha Ranjan Chakma
5. Binoy Shankar Chakma (21) s/o Doyamoy Chakma
6. Santosh Chakma (20) s/o Jubaraj Chakma
7. Romend Chakma (22) s/o Nutun Chakma
8. Aloran Chakma (21) s/o Debarshi Chakma
9. Johnson Chakma (22) s/o Subhash Kusum Chakma
10. Bishan Chakma s/o Bhuban Chakma
11. John Chakma s/o Inglon Chakma
12. Uma Chakma d/o Tarachand Chakma