MIMA-in Home Minister an hmu

Mizoram Merchant Association (MIMA) hruaitute chuan August 5, Thawhṭanni khan Home minister K Sapdanga an hmu a, Aizawl khawpuia bungraw hlàn leh hlàn thlak chungchanga an harsatnate an thlen.

MIMA chuan, Traffic SP-in holiday leh Inrinni pawh huam tela bungraw hlân leh hlân thlak phal loh hun a puan chungchang leh, peak hour chhung chu 8:30 - 10:00 leh 4:00 - 6:00 ni se an duh thu an thlen tih an tarlang a, "Lo en zui a tiam avangin lawmawm kan ti hle a ni," an ti.

Home Minister hnenah hian MIMA chuan, Mizorama hnam dang awm zingah ILP mumal nei lo an tam thu te, hnam dang kum hnih dam ILP an neih chuan an sumdawn mai zel thu leh ṭha lo an tih thu te, ILP chungchang felfai taka vawna kalpui a nih theih nan sorkarin ILP Board din se an duh thute an thlen bawk.