National Space Day lawm

Mizoram Remote Sensing Application Centre, Indian Space Research Organisation leh North Eastern Space Applications Centre ṭangkawp chuan nimin khan Assembly Annexe conference hall-ah National Space Day, 2024 lawmna an buatsaih a; School Education minister Dr Vanlalthlana'n a hmanpui.

Dr Vanlalthlana chuan, van theng reng hriatna chu Mizoram pawhin a hmang ṭangkai hle tih a sawi a, "Kan rama chhiatrupna thleng thei laka lo inralrinna kawngah thil ṭangkai tak a ni. Vawiina sikul naupangte hian in thil hriat duhna chu tipung zel ula, thil thar leh khawtlang tana kan ṭangkaipui tur ngaihtuah chhuah zel tum ang che u," a ti.

Education Minister hian National Space Day, 2024 puala quiz intihsiak lawmman a sem nghal a; Saitual HSS chu pakhatna niin, pahnihna chu Mizo HSS leh pathumna chu Synod HSS an ni a; sikul 25 aṭangin zirlai pahnih ṭheuh an tel a ni.