Bawlhhlawh sawngbawlna sawiho

Serchhip district bawrhsap Paul L Khuma hoin nimin khan DC meeting hall-ah bawlhhlawh sawngbawlna, Solid Waste Management Centre (SWMC) sakna tur chungchang sawiho a ni a; Serchhip Lungrual Ram leh Chhiahtlang daia Tualthah Mual chu SWMC atana hman kawp dan dap ṭha an ti.

Serchhip Solid Waste Management Centre sakna tur hi Serchhip khaw daia Lungrual ramah ruahman a nih laiin, Serchhip khaw mipui tuitlan ber Tuikum a hnaih avangin Chhiahtlang khaw dai hmun remchang dap chhunzawm a ni a, hetihlai hian bawlhhlawh phurtute tan a panna kawng a thui deuh avangin UDPA department chuan ngaihtuah nawn leh ni se, tiin DC hnenah an thlen a ni.

Ṭhutkhawmah hian UDPA leh district administration kengkawhtute bakah, PHE leh Serchhip Ṭhalai Pawl aiawhte an tel a; Tuikum tui lakna ti bawlhhlawh lo zawngin Serchhip Lungrual Ram leh Chhiahtlang daia Tualthah Mual chu a kawpa hman dan dap ṭha an ti.

SWMC tur Lungrual Mualah hian bawlhhlawh ṭawih thei lo (dry waste) sawngbawl a ni dawn a, sawngbawl a nih hnua hman tlak lohte chu landfill-ah dah tur a ni. Landfill hi Chhiahtlang daia Tualthah Mualah siam a ni ang.