MPYCC leh ZPM ṭhalaite'n Lalremsiami an lawmpui

Mizoram Pradesh Youth Congress Committee (MPYCC) leh ZPM party ṭhalaite chuan thuchhuah siamin, International Hockey Fe­deration (FIH)-in khawvela hmeichhe hockey player chhuak thar beiseiawm ber '2019 FIH Women's Rising Star of the Year' atan Lalremsiami, Kolasib an thlang chu ropui an tih thu leh Lalremsiami an chhuan thu an tarlang.

MPYCC chuan, "Mizo nula, India ram hmeichhe infiammite zinga he chawimawina dawng hmasa ber a ni hi chhuanawm kan ti a, a kal zelna turah duhsakna kan hlan a ni," an ti. Cong­ress sorkar laia Sports minister Zodin­tluanga hmalakna zarah Mizoram infiammite tan district tinah in­fiamna hmunhma ṭhahnem tak din a ni tih sawiin, "Sport hmasawnna ruhrel neih ṭhat chhawr thiama infiammite'n theih­tawp chhuaha ṭan la a, khawvel tukverha Zo fate min dah chhuahpui ta mawlh mawlh hi lawmawm kan ti tak zet a ni," an ti.

ZPM ṭhalai chuan, Lalremsiami an chhuan thu sawiin, "A kal zelna turah Pathianin awmpui se la, duhsakna sang ber kan hlan a ni," an ti a; FIH Rising Star of the Year a dawn chungchangah Lalremsiami’n, 'He chawimawina hi keima dawn a ni lo a, Mizo mipui dawn a ni,' tia a sawi chu ropui an tih thu leh, Mizo nula, harsatna tam tak paltlanga dinhmun sang taka hruai thlengtu Pathian chungah an lawm thu an tarlang bawk.