Mi thattu man turin PZP-in phût

Páng Zirlai Pawl (PZP) chuan thuchhuah siamin, August 14, 2020-a thia chhar Lalrinzuala (43) s/o Sumtuahngura, Bungtlang South chu mi kut tuara thi a nih ngei an rin thu an sawi a; a rang thei ang bera pawi khawihtu man tura sorkar an phût thu leh a na thei ang bera hrem an phût thu an tarlang.

Lalrinzuala chu kumin August 14 khan a nupui leh a fanu feha kalte'n an lo thláma thiin an hmu tih sawiin PZP chuan, "Pu Lalrinzuala hian misual kut a tuar ngei niin a lang a, a ring ruh a tliak a, a nâk veilamah vih niin, a chal leh a keahte pem a nei bawk. Police leh medical lamte'n a ruang lain post-mortem tura tih a ni," an ti a; Lalrinzuala chu August 13, 2020 zanah misual kut tuara thi ni ngeia rin a nih thu an sawi.

PZP tarlan danin, Lalrinzuala thih chungchangah hian a chhungte'n August 14, 2020-ah Bungtlang South Police outpost-ah first information report (FIR) an thehlut a, police-in an chhui mek. PZP chuan, "Tun thlenga police-te'n tualthattu an la man lo leh post-mortem result hriat a la ni lo hi hriatthiam harsa kan ti," tiin an tarlang.