YMA kumpuan hawng YMA hi politics rawngkai lo a ni tih Inzirtir leh a ngai tawh - CYMA President

Kum 2015-a YMA kumpuan, 'Ram leh hnam humhalh' tih chu nimin khan Central YMA Hall-ah CYMA president hlui Lalchungnunga'n a hawng. He huna thusawitu CYMA president Lalbiakzuala chuan, YMA chu politics rawngkai lo a ni tih inzirtir thar leh a ngaia a hriat thu a sawi.

YMA kumpuan hawnna hun hi CYMA vice president Vanlalrema Rokhum-in a kaihruai a; Lalbiakzuala chuan, "Tunlai kan tualzál nun enin YMA hi politics rawngkai lo a ni tih inzirtir leh a ngaiin a lang. YMA hi ruling party-in a thunun theih a hlauhawm a, opposition party fuihpawrh theih pawh a ni tur a ni lo. YMA hruaitu zingah party-a affiliation ti an awm ang, mahse YMA-ah chuan political party seng luh tur a ni lo," a ti.

CYMA President chuan, YMA-in sawi­selna hrang hrang a tâwk ṭhin tih sawiin, "Kuang lo nawr anga puhna leh tih tur ti loa puhnate kan dawng ṭhin. Tun thlengin YMA kalsualna kan la hre lo. Mizoram chhe tur veng tur leh a chhe lai siamṭha tura kan thawhchhuah loh chuan tu nge thawk chhuak chuang ang," a ti a; ram leh hnam tana ṭha tura hriatah chuan YMA-in theihtawp a chhuah ṭhin thu a sawi.

Hmanlai YMA leh tunlai YMA a inan theih loh thu sawiin, Lalbiakzuala chuan, "Hun inher danglam zelah YMA hi a din chhan leh thil tum danglam chuang loa a inher danglam ve zel a ngai a ni," a ti.

Lalbiakzuala chuan, YMA-in eng ang pawhin hma sawn mah se, a innghahna thuvawn - Ṭanpui ngaite ṭanpui thlahthlam a nih chuan YMA a boral mai ang tih a hlauhawm thu a sawi a, "Ṭanpui ngaite ṭanpui kan hlamchhiam chuan kan mit hmuh lai ngei hian YMA hi a bopil thei a ni," tiin, YMA member-te chu ṭanpui ngaite ṭanpui uar deuh deuh turin a fuih.

Kumpuan hawngtu Lalchungnunga chuan, Mizoram chu tharum hmanga chhan a ngai tawh tih sawiin, "Tharum han tih hian mi rîkrâp a, an thil neih chhuhsak a, va sawisak lam a ni lo. An thawh ang thawk peih ila, an tuar ang tuar peih ila, chhawr an nawm angin chhawr nuam ve ila, dawr an nawm angin dawr nuam ve ila, an awm reng peih hauh lo ang," a ti.

Lalchungnunga chuan, ram leh hnam humhalh turiin intodelh a ṭul tih sawiin, "Kum 1954 hnu lamah chuan engtik lai mahin Mizote hi kan intodelh ngai tawh lo. Mizo rilru pangngaiah chuan mite châwm hlàwm, mi thatchhia leh mi dawizep nih kan duh ngai lo," a ti a; tuna Mizoram dinhmun­ah chuan ṭhenawm ramte'n Mizote chu rilṭam, pachhia, hna thawk tlem anga an hmuh thu a sawi.

Khawchhak lam aṭanga Zo hnahthlak rawn lutte chungchangah Lalchungnunga chuan, "Kan khawtlang leh kohhran thlenga an inhman khan phal. Chhiatni ṭhatniah kan en hrang ngai lo," a ti a; chutih laiin khawchhak mikhualte'n ram hausate khawngaih leh chhawmdawl an beisei avangin Mizote an hêk ṭhin niin a sawi.

YMA kumpuan hawnnaa tarlan danin, tun dinhmunah Mizoramah YMA branch 804, group 46 leh sub-hqrs. panga a awm a, YMA member zawng zawng chu 3,90,937 an ni.