MNF-in bawhzui tum

MNF chuan thu­chhuah siamin, kum­ina kawngzawh leh total bandh an neih chhan MNF thil phûtte a hlawhtlin loh chuan sorkar hawiher milin a rang lama bawhzui an tum thu an tarlang.

MNF office bearer-te chuan nimin khan Mizo Hnam Runah February 25-a total bandh an huaihawt an thlir let a; bandh an huaihawt chhan chu a hlawhtlin theih nan bawhzui zel an rel a ni.

MNF chuan, chief minister Lal Thanhawla'n tui bill Rs. 100 aṭanga Rs. 200-a tihsan sawi pial a tum te, buhfai man hi kg. khat Rs. 9.50 aṭanga Rs. 15-a tihsan chu thingtlangah mi tumahin an sawisel a hriat loh thu a sawi te, zu zawrh a ṭul anga a sawite chu Mizo mipui, kohhran leh tlawmngai pawlte thamlohna lian taka an ngaih thu an sawi.

MNF chuan, thlanmual leh biak-in aṭanga chhiah lak tura tih tawh, chawlhsan lailawk (suspend) chu suspend ringawt ni loin, tihtawp hmak an phût thu an sawi a; thisen sawngbawlna man lak pawh tihtawp nghal an phût thu sawiin, "Kum khat chhunga Mizoram puma thisen mamawh zat pek chhuah hi sorkar lai tan buaina tham a tling lo," an ti.