National Science Day hman a ni

Directorate of Science & Technology bultumin nimin khan Planning minister Lalsawta hoin a pisaah National Science Day hman a ni a; thupui chu 'Science - ram leh hnam dinchhuahna' tih a ni.

Lalsawta chuan, tunlai khawvelah science leh technology a ṭhang zel a, ram changkang leh hmasawn apiangte chu science leh technology-a hmasawn ram an ni tih sawiin, "India ram pawh vansang lam thiamna mai ni loin, nuclear hmang ṭangkai thiam ram a ni. Mizoramah pawh science leh technology lamah hma chak taka lak chhoh mek a ni," a ti.

Mizoramin hma a sawn zel theih nan kawng hrang hrangin zirbingna kalpui mek a ni tih sawiin, Lalsawta chuan, "Tunah hian science leh technology hnuaiah thil hmuhchhuahte neitu nihna vawnhim sakna - Patent Information Centre kalpui mek a ni tawh," a ti a; science leh technology tel loin hmasawnna tluantling a awm thei lo tih a sawi.

Inkhawm kaihruaitu, chief scientific offcer Dr Vanlalzara chuan, National Science Day chu kum 1986 aṭanga hman ṭan a nih thu a sawi a, thupui hrang hranga neia hman a nih ṭhin dan a sawifiah.

National Science Day hi February 28-ah hman ṭhin a ni a, kuminah chuan Inrinni a nih avangin nimin khan hman a ni.