Minorities Commission member-in Mizoram sorkar officer-te a kâwm

National Minorities Commission member, Capt. Praveen Davar chuan nimin khan Secretariat Conference Hall-ah chief secretary Lalmalsawma hoin Mizoram sorkar official-te a kâwm.

Capt. Praveen Davar chuan, Mizoram chhungah Minority Affairs Ministry hnuaia hmalakna pahnih - Prime Minister’s 15 Points Programme leh Multi-Sectoral Development Programme (MSDP) eng ang chiaha ṭhain nge kalpui a nih tih endik tura Mizorama rawn kal a nih thu a sawi.

Mizorama cheng tam zawk chu Kristian an nih avangin minority an ni tih sawiin, Praveen Davar chuan, "State mipui tam lam aṭanga chhût chuan Kristiante hi majority an ni thung. Sakhaw dang betu mi tlêm zawk India danpuiin minority-a tihte hi ngaihven leh duhsak an ngai a, chu chu Mizoram sorkarin pawhin ngai pawimawh se ka duh a ni," a ti.

Meeting-ah hian Social Welfare, School Education, UD&PA, Rural Development, LE&IT department-te leh MBSE hotute'n Minority Affairs Ministry hnuaia hmalakna an kalpui dante an sawi a ni.

Capt. Praveen Davar hian nimin vek khan Mamit a tlawh a, DC conference hall-ah DC Vanlalngaihsaka hoin sorkar official-te a kawm.