Congress a sorkar hnuah mipuiin Police an ring ngam ṭan: HM Zira

Nimin khan Rajiv Gandhi Stadium, Mualpuia Mizoram Police Sports Meet chu khâr a ni a, kharna inkhawma khuallian, Home minister R Lalzirliana chuan, Congress-in sorkarna a siam hnuah Mizoram police-te chu mipuite'n an ring ngam leh ṭan niin a sawi.

Home Minister chuan, Mizoram police zingah inthununna thlahdah vanga dul kiar an tam hle tih sawiin, over weight lo tura training nasa zawk pe turin police hotute chu beisei an ni tih a sawi a, dul kiar vanga training inpek chu inhremna a ni lo tih a sawi.

Mizoram police-te chu mipuite'n thlamuanpui tlakah an ngai tih sawiin, R Lalzirliana chuan, Mizoram hmun hrang hrangah police-te'n awmhmun an khuar a, khawtlang venhimsak turin dilna tam tak an hmuh reng thu a sawi a; chutih rualin, sum tam lo vangin police station leh out-post an duh anga tam an dah theih loh thu a sawi a ni.

Home Minister chuan, Mizoram police building ṭáwl tawhte chu siam ṭhat hna thawh a ni dawn tih a sawi a; India hmarchhaka a hmasa ber turin hmeichhe bik awmna jail siam tura ruahhmanna siam a nih thu a sawi bawk.

DGP Dharmendra Kumar pawhin thu sawiin, Mizoram Police Meet chu police hnathawkte inunauna atan thil ṭha tak a nih thu a sawi.

Mizoram Police Sports Meet hi February 23, 2015-ah ṭan a ni a, Central Range chu team champion niin, Red Group leh PHQ team-te chu pahnihna leh pathumna an ni.