Bandh-ah zirlai exam phalsak

Central Young Lai Association (CYLA) chuan February 24 aṭanga tiamchin awm loa LADC huam chhunga total bandh an neih chu an la chhunzawm zel a, nimin aṭanga ṭan HSSLC exam turte erawh chu an dang lo.

CYLA chuan he thuziah lai thleng hian an thil phût - Lawngtlaia P&E division dah, Lunglei leh Lawngtlai inkar kawng siamṭhat leh World Bank sum hmanga kawng laih tur Samang tlangdung pal­tlangtir loh chungchangah sorkar aṭangin thu dawn an la nei lo. Sorkar aṭanga thu lawmawm an hmuh hma loh chuan bandh hi kaltlangpui zel an tum thu CYLA hruaitute chuan an lo sawi tawh a ni.

Hetihlai hian Lai Students’ Association (LSA) General Headquarters, Lawngtlai chuan thuchhuah siamin, Central Young Lai Association (CYLA)-te’n February 24, 2015 aṭanga tiamchin awm loa total bandh an huaihawt chu an thlawp thu an tarlang.

LSA chuan, Mizorama district zingah Lawngtlai district chu Power & Electricity department-a division nei lo awm ­chhun an nih thu an sawi a, CYLA-in Lawngtlaia P&E division-a hlankai an phûtna chu an thlawp tih an sawi.

NH-54, Hrangchalkawn-Lawng­tlai inkar siamṭha tura CYLA-in an nawr te, Samang tlang­dunga World Bank road kal­tlang tur an dodalte chu âwm an tih thu, LSA chuan an tarlang bawk.