NLUP Apex Board meeting nei

NLUP Apex Board chu nimin khan NIB Conference Hall-ah chief minister Lal Thanhawla hoin an ṭhukhawm a; NLUP hmalakna hrang hrang, hmasawnna leh NLUP kalpui zel dan turte an sawiho.

CM Lal Thanhawla chuan, NLUP chu mirethei kut hnathawktute’n mi hausa leh thil tithei zawkte tlawn ngai loa mahni kutkea an din ve theihna tura duan a ni tih a sawi a, “NLUP titawp tura theihtawpa beihna leh hêkna nasa tak tâwk mah se, project kalpui chhunzawm zel tura sum mamawh zat chiah Central sorkarin a rawn pe a, kalpui chhunzawm zel a ni ang,” a ti.

Chief Minister chuan, ei leh bar leh ram chhung aṭanga sum thawh chhuahah Mizoram dinhmun a chhuanawm lo tih sawiin, “Kum khatah ram chhung thar chhuah chu thla thum ei chauh a ni. Kum khat atana state sum mamawh chu vbc. 5000-6000 a nih laiin vaibelchhe 300 awrh chauh state-in a thawh ve thei a ni,” a ti.

Agriculture minister R Lalzirliana pawhin thu sawiin, NLUP chuan Mizoram hmun kilkhawr ber thlengin hmasawnna a thlen mek niin a sawi.

Meeting-ah hian kum nga chhung NLUP kalpui leh enkawltu Line department pakuate hnenah chawimawina certifcate CM nupui Lal Riliani’n a hlan a ni.