Thawhṭanni-ah zirlaite’n kawngzawh an tum

Mizo Students’ Union (MSU) general headquarters, Aizawl leh Aizawl khawpuia college hrang hranga students union-te chuan post matric scholarship-a Mizoram sorkarin a tum ve tur 10% a pek chhuah loh vanga lungawi lohna lantir nan Thawhṭanniah Aizawlah kawngzawh an huaihawt dawn.

Post matric scholarship chungchangah hian MSU hruaitute leh college SU hruaitute chu nimin khan an ṭhukhawm a, lungawi lohna lantir nana kawngzawh neih an rel a ni.

MSU chuan, Post Matrict Tribal Scholarship atana Central sorkar­in sum a tum tur 90% a rawn pek tawh chu zirlaite hnenah pek chhuah a ni tak avangin lawmawm an tih thu an sawi a; chu­tih rualin, state sorkarin a tum ve tur 10% chu pek chhuah a nih loh avangin zirlaite’n scholarship chu a kim loin an dawng dawn niin an sawi.

MSU chuan, “Mizoram sorkarin a tum ve tur 10% a tum theih loh avangin 90% chauh zirlaite’n an dawng tur hi pawi kan ti tak zet a, he 10% tum ve tur hian kan sorkar hi a pachhe lo tih kan hria,” an ti.