Mizoramah mi pakhatin kum khatah Rs. 74,920 a thawk chhuak ang a ni

National Bank for Agriculture and Rural Development (NABARD), Mizoram Regional Office buatsaihin nimin khan Aijal Club-ah Credit Seminar buatsaih a ni. NABARD chhût danin, sorkar kum 2013-14 chhung khan Mizorama mi pakhatin kum khatah Rs. 74,920 zel an thawk chhuak.

Seminar-ah hian priority sector (ngaih pawimawh zual bik)-ah kum 2012-13 chhung khan Mizoramah loan cheng vbc. 369.42 pek chhuah a ni a, kum 2013-14 ah chuan vbc. 289.73 pek chhuah a nih thu tarlan a ni. Kum 2012-13 aia 2013-14 a loan pek chhuah a tlahniam chu enfiah vat a ngaih thu an sawi.

Line department aiawhte chuan loan chungchanga harsatna awm ṭhin tihziaawm a nih theih nan bank-te’n line department nasa zawkin ráwn thei se an duh thu an sawi.

NABARD zir chian dan chuan, Mizoram mipui 60% chu loneih leh kuthnathawka eizawng an ni a, kum khat chhunga state mipui ei tur buhfai a mamawh 30% an thawk chhuak.

Horticulture hnuaia hmalakna atan hman theih ram hectare nuai 11.56-ah hectare 1.21 hman ṭangkai a ni a, sangha dil siam theihna hmun hectare 4500-a zauah 18.75% chiah hman ṭangkai a ni.

NABARD chhût lâwk dan chuan, kum 2015-16 chhungin Mizoram chhunga bank awmte’n loan cheng vbc. 746.04 a sem chhuak dawn a; loan pumpui aṭanga chhûtin 20% chu agriculture term loan, 9% chu crop loan, 12% chu Micro and Small Enterprise Sector (MSME) loan leh a bak 49% chu other priority sector loan atan ṭhen a ni.