School Education mite fimkhur turin chah

Mizoram Education Inspecting Officers Association chuan nimin khan General Conference an hmang a; khuallian, parliamentary secretary (Education) Joseph Lalhimpuia chuan, School Education department chu mipui thlir bik a nih avangin fimkhur a ṭul thu a sawi.

Joseph Lalhimpuia chuan, School Education-in ram tan eng nge a thawhchhuah tih aiin, eng nge a tih loh tih chu mipui thlir dan a nih thu a sawi a, “School Education department-in kan rama mithiam tam tak a chher chhuah vanga hna thawh ropui tak tak hmuh tur lo awm ta te, infrastructure tam tak din a lo ni tate hi mipuite’n min hriatpui se ka duh a ni,” a ti.

Sum harsa tak karah tun hnai khan zirtirtu eng emaw zat selection grade-a kaite arrear tihfel sak a ni tih sawiin, Joseph Lalhimpuia chuan, “Sum leh paia harsatna sawi uar ber kumah February thla thleng hlawh tur LOC pek chhuah tawh a ni a, hei hian contract-a thawkte pawh a huam vek,” a ti a; hetiang hi School Education department-ah a la awm ngai loh thu a sawi.