MPCC-in báng turin Tawnluia an phût

Mizoram Pradesh Congress Com­mittee (MPCC) chuan thuchhuah siamin, deputy chief minister Tawnluia avangin Khawzawl leh a chhehvelah buaina a thleng nasa niin an tarlang a, Dy Chief Minister chu báng turin an phût.

MPCC chuan, village council inthlan neih tâkah Khawzawl khaw chhung leh a chhehvelah MNF party hruaitute avangin buaina a thleng nasa nia sawiin, "Khawzawl chhung MNF-in sorkarna an siam theih lohna veng ṭhenkhata Congress leh ZPM party ticket-a thlan tlinte chu MNF party hruaitute'n MNF VC siampui tura sáwmin, thil chi hrang hrang tiamin an thlêm nasa hle. Dy. CM, bialtu MLA ni bawk Pu Tawnluia thu hmuin, a hming chhál meuhin contract leh sorkar hna tawktarhin an thlêm nasa hle a ni," an ti.

MPCC tarlan danin, Tualte-ah pawh party dang aṭanga thlante an thlêm a, Riangtleiah chuan ZPM ticket-a thlan tlin chu vau betin, sorkarna an siam phah tawh a ni. Tlangpuiah pawh an tui lâkna tur project tihtawpsakah vauin, MNF VC siam tumin Dy. CM hmingin an che nasa hle bawk.

MNF party hruaitute chu an chak lohna an pawm thei lo-ah puhin MPCC chuan, "Contract, sorkar hna leh thil chi hrang hrang tawktarha party dang aṭanga thlan tlinte laka mawi lo taka an che vak mai hi mipui duh thlanna zah lohna a ni a, heng zawng zawng hi Dy. CM Pu Tawnluia thu hmua ti an ni tih a chiang hle bawk," an ti.

Congress party chuan, Mizo politician senior berte zinga mi, Dy. CM Tawnluia chêt duh dan chu mak an tih thu sawiin, "VC-te thlangtu mipui leh, ram inrêlbàwlna democracy zah lohna dik tak a nih avangin Pu Tawnluia hi ram hruaitu ni tlakah kan ngai lo a, a rang thei ang bera a nihna aṭanga báng ngei turin kan phût a ni," an ti a; opposition party aṭanga thlan tlin VC leh LC member-te chu anmahni thlangtu mipuite hre reng a, thlêmna bawlhhlawh laka inthiar fihlim turin an chah a ni.