Mizorama hripui vei zingah sipai 401 an tel

Mizorama Covid-19 vei hmuh chhuah tawh mi 1,048 zinga mi 487 chu civil mi an ni a, hnam dang truck driver/handyman mi 160 leh sipai chi hrang hranga mi leh sa 401 an tel bawk.

Civil mi hripui kai hmuh tawh mi 487 zinga 293 chu an chhuak tawh a, mi 194 an la chhuak lo. Hnam dang truck driver/handyman zinga Covid-19 vei hmuh chhuah tawh mi 160 zinga 83 chu chhuahtir an ni tawh a, mi 77 chu Covid Care Centre-ah an la awm mek thung.

Covid-19 vei sipai mi leh sa zingah BSF tam berin, 241 an ni a, mi 187 chhuak tawhin, mi 54 an la chhuak lo. Assam Rifles mi 107 zinga 67 an chhuak tawh a, mi 40 an la chhuak lo a; NDRF mi 32-te an chhuak kim tawh.

CRPF zinga Covid-19 vei pali hmuh chhuah a ni tawh a, an zinga pathum chhuak tawhin, pakhat la enkawl mek a ni a; BRO mi pathum-te an la chhuak lo vek thung. Indian army zingah mi 14 hripui vei hmuh chhuah a ni tawh a, an zinga a tam zawk chu Mizo an ni a; mi 14 zinga pali chhuahtir an ni tawh.

(Thlalak: Hripui vei dam tawh nimina chhuahtirte)