Sorkarin aikal lâk titawp tura hmalak zel dan tur a ruahman; Pisate endik thut ṭhin dawn
Mizoram sorkar chuan sorkar hnathawk aikal lâk titawp tura hmalak zel dan turah ruahmanna a siam a; ruahmanna pakhat zingah sawi lâwk loa pisate endik thut (suprised checking) a tel.
Department of Personnel & Administrative Reforms (DPAR) hotute hnen aṭanga thu dawn danin, Mizoram sorkar chuan aikal lâk tihtawp a nih theihna turin hma a la zel a; sorkar hnathawk zingah aikal la mi tam tak an awm tih hriain inchinfelna hun a siamsak. Department hrang hrang aṭangin aikal la an neih dan report pe turin hriattirna a lo chhuah tawh a ni.
Aikal late leh an dinhmun thehluh hun sorkarin a ruat a tâwp tawh avangin aikal lak tihtawp vek a nih theih nan sorkarin ruahmanna a siam a, aikal lâk tihtawp a nih ngei theih nan sorkar chuan hmalak zel a tum. A ruka aikal la la ru reng an awm loh nan sorkar thawhpui turin sorkarin mipui a sáwm a ni.
Aikal chungchanga hmalak zel dan tur chu August 5, 2024 khan DPAR Secretary hoin a pisaah sawiho a ni a, ruahmanna hrang hrang an siam nghal. Sorkarin aikalte dinhmun report thehlut tura department-te a tih hun chu August 3, 2024 khan a tawp a, department 41-in report an thehlut tawh.
AIKAL LAK TITAWP TURA RUAHMANNA
☑ Kum tirah DPAR (ARW)-in aikal list a khawn khawm a, department-te'n list an thehluh leh tuna compliance report an thehluhte en kawpa manual checking neih ni se.
☑ Department wise report siam ni se; chawlh la chhunzawm nghal, voluntary retirement emaw, invalid pension emaw dilte leh a dangte chhinchhiah hran ni se.
☑ Cross-checking neih zawh hnuah hna la zawm lo (sorkar thupek zâwm lo) an awm chuan dan anga action la turin administrative head of department (secretary, etc.) hnenah action la tura hriattir ni se. Action lak a nih dan ni 10 chhungin thehlut tura hriattir a ni ang.
☑ Action la lo an awm chuan controlling officer chungah disciplinary proceeding draw tur a ni.
☑ Department zawng zawng en zawh hun nghak loin, en zawh hmasak apiang hriattir nghal zel tur a ni. Heti chunga aikal la ruai chhunzawm zel an awm a nih chuan controlling officer - head of office, head of department, etc. te mawhphurhna a ni ang a, kal phaltirtu chungah dan angin disciplinary proceeding draw a ni ang.
☑ A rûka aikal ruai an awm leh awm loh endik turin office hrang hrangah surprise checking neih tur a ni. Aizawl district bik chu DPAR-a thawktute'n an endik ang a, district dang zawngah DC-te'n mawhphurhna an la ang.