Mizoramin union budget a zir chian a ṭul - Mizoram BJP

BJP, Mizoram Pradesh president Vanlalhmuaka chuan nimin khan Aizawl Press Club-ah thuthar thehdarhtute a kâwm a; Mizoram sorkarin sorkar laipui budget a zir chian a ṭul thu leh hmasawnna thlen thei sum tam tak a awm thu a sawi.

Vanlalhmuaka chuan, union budget 2024-25 ah Mizoram tan sum tam tak hai chhuah tur a awm thu sawiin, "Sum hai chhuak tur hian sorkar laipui thawhpui thiam a pawimawh. Kan sorkar hrawn mek hian uluk taka central sorkar budget a zir chian a, Mizoram hmasawnna atan a hman duh phawt chuan state-in a hranpaa hand holding policy emaw, SEDP emaw ngai loin Mizoram tan hmansawnna a thlen thei vek a ni," a ti.

BJP President chuan, Employees' Provident Fund (EPF) hmangtute tan sorkar laipuiin thla tin Rs 3,000 a tumsak dawn thu a sawi a, kut themthiamna lam zir (skill development training)-te tan thla tin stipend Rs 5,000 pek a nih dawn thu a sawi bawk.

Union budget chu Mizo ṭhalai hna nei lote tan malsawmna thlentu a ni thei nia sawiin Vanlalhmuaka chuan, "Skill development atan cheng vbc 1.48 dah a ni a, ṭhalai 20,00,000-in eizawnna thiam thil an neih ngei theihna atan ITI 1,000 siamṭhat a, training kum nga chhung neihpui te, ram chhunga zirna sang zir duhte bank loan cheng nuai 10 pek theihnate hi ṭhalaite'n Mizoram sorkar kaihhruaina fel tak hnuaiah kan chhawr thei," a ti.

Mizoram BJP President chuan, sorkar laipui scheme hrang hrang hnuaia loan-te chu a mamawhtute'n dik taka an chhawr ṭangkai theih nan Mizoram sorkarin bank-te a thunun a ṭul thu a sawi.

Vanlalhmuaka chuan, "PM Vishwakarma, PM SVANidhi, National Livelihood Mission, Stand Up India kaltlangin Mizorama kut themthiam te, puan tahtu te, khawpui kawng kama dawr siamtute (street vendor)-te tan loan a awm bakah, MUDRA loan pawh cheng nuai 10 aṭangin nuai 20-ah tihpun a ni," a ti a; sorkar laipui aṭanga sum hâi chhuah kawngah Mizoram sorkarin harsatna a tâwk a nih chuan pui turin an inpeih reng thu a sawi bawk.

MIZORAM BJP TARLAN ṬHENKHAT

◆ Union budget hi state specific budget ni loin, India ram pumpui ministry/sector wise-in budget allocation siam a ni.

◆ Mizoram tan eng sector-ah nge sum kan mamawh tih zir chian leh project ṭha siam a, kan state hmasawn nan sum zuk dil mai tur a ni.

◆ India hmarchhaka loneitute tan cheng vbc. 12,122.24 dah a ni a, Mizorama loneitute dinhmun pawh nasa taka tihhmasawn theih a ni dawn.

◆ PMGSY 4th phase kaltlangin thingtlang khua 25,000 kawng siam a ni dawn a, Mizoram pawhin kan chhawr thei.

◆ Ministry of Rural Development hnuaiah mirethei chenna tur in nei lo nuai 200 in sakna tur a awm a, Mizoramin kan chhawr ve thei.

◆ Ministry of Social Justice leh Tribal Welfares hnuaiah tribal awmna khua 63,000 tan hmasawnna tur sum tam tak dah a ni.

◆ Mizoram hi tribal 96% awmna state kan nih avangin union budget 2024-25 hi nasa takin kan chhawr thei.