Lunglei-Tlabung kawng siam mekah kum 3 chhungin 38% vel chauh thawk

Lunglei-Tlabung inkar NH-302 kawngpui zauh leh siam mek chu nimin khan Lunglei additional DC Rochuangkimi Khenglawt kaihhruai inspection team-in an enfiah. Kawng siamah hian hna thawh tur awm zawng zawng aṭangin kum thum vel chhungin Package A-ah 38.20% leh Package B-ah 37.65% chauh zawh a la ni.

Inspection team-ah hian Additional DC bakah, Land Revenue & Settlement department-a settlement officer Lalrinawma leh department-a thawktu dangte an tel a; kawng enkawltu chu National Highways and Infrastructures Development Corporation Limited (NHIDCL) niin, contractor chu BRN Infrastructures Private Limited a ni.

NHIDCL website-a tarlan danin, Package-A Lunglei-Chhumkhum km. 37.420-a thui siamna atan cheng vbc. 698.45 ruahman niin, kum 2021 laihâwl vel khan thawh ṭan a ni a, December 30, 2022-a zawh tura tih ni mah se, an zo hman lo a, December 31, 2024 thleng hun pawhseisak an ni. Package A-ah hian kum 3 chuang chhungin 38.20% chauh thawh zawh a la ni a; zawh hun tur bituk ang chuan thla 5 vel chauh hun awm tawh.

Package-B Chhumkhum-Tlabung km. 37.53-a thui siamna atan cheng vbc. 740.58 ruahman niin, kum 2021 favângah hna thawh ṭan a ni a, January 9, 2023-ah siam zawh tura tih ni mah se, an zo hman lo a, December 31, 2024 thleng hun pawhsei a ni. Hetih lai hian, kum thum vel hnuah pawh hna thawh tur aṭangin 37.65% chauh thawh a la ni.

Kawng endiktute hi NHIDCL engineer-te leh BRN Infrastrfuctures hotute'n an lo dawngsawng a; fûr ruahsur leh leimin vanga kawngpui chhe lai te, leivûng paihna hmun ruahman dan te, Chhûmkhûm, Lungsen leh Tuichawnga khaw chhung hêlna kawng by-pass road siam mekte enho a ni. NHIDCL leh contractor hotute'n an hnathawh mek dinhmun an lo hrilhfiah bakah, an harsatnate an lo hrilh.

Kawng endiktute hnenah hian BRN Infrastrfuctures hotute chuan, hmun ṭhenkhata sub-grade an phah hnuah fûrin a nan avangin GSB phah hman a nih loh thu te, fûr ruahtuiin sub-grade phah sa a tihchhiat thu leh kawngin a chhiat zual phah thute an lo hrilh. Kawng chhe zual laite a theih ang anga an thawm ṭhat ṭhin thu leh NH-302 Monitoring Committee dinin vil zui reng a nih thute an sawi bawk.

Sorkar thuchhuah tarlan danin, NH-302 zauh leh siam mek hi Lunglei Hrangchalkawn-Tlabung inkar a ni a; kawng hluiah km. 96-a thui a nih laiin, kawng siam tur ruahmanna tharah chuan km. 75.070-a thui a ni ang. Kawng laih leh blacktop bakah, lui kânna tur lei lian dawh tur pathum leh lei tê dawh tur pakhat a awm a ni.