ZMC 6th Foundation Day lawm a ni

Zoram Medical College (ZMC) din champha nimin khan an hmunah lawm a ni a, Health minister Lalrinpuii leh bialtu MLA Baryl Vanneihsangi Tlau ten an hmanpui. ZMC hostel pakhat, Crawford Gents' Hostel leh Hospital Management Information System (HMIS) hawn a ni bawk. ZMC-ah hian MBBS zirlai 395 leh internship ti mek 98 an awm.

Health minister Lalrinpuii chuan, sorkarin hriselna lam, a bikin primary health sector a ngai pawimawh a, thingtlang mipui ban phak damdawi-in (primary health centre)-a doctor indaihlohna phuhrûk dan a dap nasa tih a sawi a, "ZMC aṭanga pass chhuak zinga doctor 39-te NHM hnuaia thawk tura lak nghal an ni," a ti.

Medical college ṭha nei turin hmunhma leh bungraw ṭha, zirtirtu rintlak bakah, zirlai ṭha neih a pawimawh thu sawiin Minister chuan, ZMC-ah Cardio-thorasic Wing din turin Mizoram sorkarah rawtna thlen a nih thu leh IVF Centre neih theih dan tur ruahman mek a nih thu a sawi.

July 31, 2024 dinhmun angin, ZMC-ah hian MBBS zirlai batch ruk an awm tawh a, batch hmasa bera mi 97-te chuan kumin April thla khan internship zoin ZMC an chhuahsan. Tunah hian ZMC-ah MBBS zirlai 395 an awm mek a, Mizoram mi 288, state dang mi 48 leh NRI quota-a lut 59 an ni. Internship ti mek 98 an awm bawk.

Zirtirtu (faculty) 79 an awm a, resident doctor leh demonstrator 48 awmin, doctor dang pariat an awm. Nursing staff 243 an awm a, chu'ng zinga 62 chu hmun dangah dah mek an ni a; technician hrang hrang 56 leh thawktu dang 45 an awm mek bawk. ZMC-ah hian department 22 a awm a ni.

Health Minister chuan, ZMC tihchangtlunna tur project sorkar laipuiah thlen a nih thu a sawi a, "PM Ayushman Bharat hnuaiah ICU, HDU, isolation ward, dialysis unit leh pawimawh dangte keng tel khum 50 awmna Critical Care Block dinna tur hmuh a ni a, chak taka hmalak mek a ni," a ti.

MLA Baryl Vanneihsangi pawhin thu sawiin, ZMC-a thawkte chu ram mipui rawng an bawlnaah ṭhahnemngai taka thawk zel turin a ngên a; ZMC chu a bial chhung a nih angin a ṭulna apiangah theihtawp chhuahpui a inhuam thu a sawi.

ZMC Foundation Day vawi 6-na lawmna hian zirlai ti ṭhate hnenah chawi­mawina hlan a ni a, Health secretary Sangchhin Chinzah te pawhin thu an sawi. ZMC registrar Dr Jane R Ralte-in ZMC dinhmun tlangpui a sawi a, National Health Mission mission diector Dr Eric Zomawia'n HMIS chungchang a sawifiah.

August 7, 2018 khan khatih laia chief minister Lal Thanhawla'n Mizoram Institute of Medical Education and Research (MIMER) a hawng a, a tira a hming MIMER tih chu Council of Minister thutlukna angin April 26, 2019 khan Zoram Medical College tia thlak a ni. National Medical Commission-in June 16, 2023 khan recognition a pe.

ZMC (State Referral Hospital)-ah damlo khum 430 a awm a, out-patient department (OPD)-ah department 14 an awm. OPD-a inentirte hnenah a remchan dan angin damdawi ṭhenkhat chu a thlâwna pek ṭhin a ni. Golden card (AB-PMJAY), Mizoram State Health Care Scheme, ESI Scheme, ECHS, RBSK, Dr Ambedkar Scheme-ahte empanelled hospital a ni.

Nimina hawn tak Crawford Gents' Hostel hi residential hostel pahnih awmna a ni a, NESIDS aṭanga hmuh cheng vbc. 10 hmanga sak a ni. October 24, 2021-ah sak ṭan niin, October 24, 2023 khan zawh a ni a, contractor chu Ngurzamlova, Kolasib a ni. Hostel-ah hian single room 10, double room 37 leh khum 84 a awm.