Champhaiah pisa an dang leh; MZP-in lungawi lohna lantir an titawp
MZP Headquarters, Champhai chuan Champhai College-a zirtirtu dah belh phûtin nimin khan sorkar pisa leh bank-a kal turte an dang leh a, nimin vek tlai dar 4 aṭangin lungawi lohna lantir an titawp.
Champhai MZP hian lungawi lohna lantirin August 2, 2024 khan Champhai College-a zirlai leh zirtirtu kal turte an dang a, an beisei ang thu lawmawm sorkar aṭanga an hmuh loh avangin August 5, Thawhṭanni aṭang khan Champhai khawpuia sorkar pisa leh zirna-inte an dang leh a ni.
MZP-te chuan an beisei ang an la hmuh loh zel avangin nimin khan sorkar pisa leh bank-a kal turte an dang leh a; sikul leh college-a kal turte erawh an dang tawh lo.
Champhai MZP chuan an beisei leh an phûtte sorkarin tihlawhtling rih lo mah se, nimin tlai dar 4 aṭang khan lungawi lohna lantir an titawp a; zirtirtu sem rual a nih hunah an beisei ang pek an nih loh chuan lungawi lohna lantir leh an tum a ni.
MZP Hqrs, Champhai chuan thuchhuah siamin, zirtirtu indaih lohna hnawhkhat tura sorkar an ngen chungchangah sorkar biak leh a nih thu an tarlang a, "Zirtirtu sem rual a nih hunah dah ngei tura theihtawp chhuah an inhuam avang leh Champhai District NGO Committee nen ngun taka sawiho a nih hnuah August thla chhunga sorkarin zirtirtu sem rual a neih turah kan mamawh ang zirtirtu pek ngei kan nih theihna tura sorkar sawi chu zahawm kan ti a, hengte avang hian zirtirtu dah belh ngiata sorkar laka lungawi lohna kan lantir chu tihtawp a ni," an ti.