Mamitah National Handloom Day hmang

Mamita Siamliana Hall-ah nimin khan National Handloom Day vawi 10-na pualin Handloom Exibition huaihawt a ni a, minister PC Vanlalruata'n a hawng. Minister ho hian Mamit Chhimveng hall-ah National Handloom Day pualin hun hman a ni bawk.

National Handloom Day hmanna leh exhibition hi Ministry of Textile hnuaia Development Commissioner (Handlooms) bul tuma Mizoram Handloom & Handicrafts Development Cooperation Ltd (ZOHANDCO)-in an buatsaih a ni a; exhibition-ah hian stall 26 awmin, August 9, 2024 thleng neih a ni ang.

PC Vanlalruata chuan, puantah chu Mizo pi leh pute hun aṭanga thil pawimawh a nih thu a sawi a, "Kan silh leh fên kan dinna a ni a, tun thlengin Mizote rilruah a pawimawh. Mizo hmeichhiate dinhmun chawi kâng turin handloom industry ṭhan len a ṭul a ni," a ti a; puantah chu eizawnna tling leh tlak a nih avangin ṭan la turin Mizo hmeichhiate a sáwm

ZOHANDCO hmalakna chu mipuiin ṭhahnem an ngaihpuia thawhhona ṭha an neihpui a ṭul thu sawiin Minister chuan, "Handloom industry hi industry lian ber pawl a ni a, innghahna tlak eizawnna tam tak a siam a ni," a ti a; puantah chu Mamit district tana eizawnna pawimawh a nih theih nan ṭan la turin MHIP-te a chah.

National Handloom Day hi kum 2015 aṭangin hman a ni a, prime minister Narendra Modi-a'n Chennai-ah a hawng. Mamita Handloom Day hmannaah hian ZOHANDCO chairman Lalliansawta leh Mamit bawrhsap Jacob Lalawmpuia te pawh an tel a ni.