World Peace Day hman a ni

Young Men Christian Association (YMCA), Aizawl chuan August 6, Thawhlehni khan IPR Auditorium-ah World Peace Day an hmang a; chief minister Lalduhoma'n hmanpuiin, hmasawn zel duh chuan remna leh muanna tundin tlat tur a nih thu a sawi.

Lalduhoma chuan, khawvelah indona chanchinin hmun a luah tam tih sawiin, "Indona hi a lo irh chhuah chhan chu eng pawh ni se, a hmáwrbàwkna chu dawhkana inbiakna hmanga chinfel a ni deuh zel. Buaina hmunah hmasawnna a kal thei lo a, kum 20 chhung rambuai kan tawrh tawh aṭangin chu chu kan hmu. Kan ram leh hnam hian hmasawn zel kan duh a nih chuan remna leh muanna kan tungding tlat tur a ni," a ti.

World Peace Day hmannaah hian YMCA Aizawl president Dr R Lalthangliana, NE India regional chairman ni bawk te, regional secretary Shamir J Thabah leh YMCA Aizawl general secretary K Lalsawmvela te pawhin thu an sawi. Central YMA general secretary Prof. Malsawmliana'n 'Building a just world - Justice, peace, equity & human rights for all' tih thupui a sawi a ni.