Naupang venhim dan tur sawiho

Serchhip additional SP Saidingliana Sailo kaihhruaiin nimin khan a pisaah Police, Juvenile Justice Board, Child Welfare Committee, Special Juvenille Police Unit, District Child Protection Unit leh Women & Child Development hotute'n naupang venhimnaah ṭha zawka thawhho dan tur an sawiho.

Ṭhutkhawmah hian mipuiin naupangte dikna chanvo humhim a pawimawhzia leh an laka pawi khawihtute chunga hremna lekkawh theih dante chiang zawka an hriat theih nan zau zawka puanzar dan tur sawiho a ni a; naupang venhimnaa mawhphurhna neitute tih tur inhrilh tharna leh naupang enkawl leh venhim dan tur rawtna hrang hrangte sawi a ni bawk.

Meeting-a tarlan danin, Juvenile Justice (Care and Protection of Children) Act-in naupang thil sual ti emaw, enkawl leh venhim ngai buaipuitu police-te chu uniform hâk a remti lo. Naupang chu kutkawl (handcuff) buntir phal a ni lo a, jail-ah emaw thana-ah emaw zan riahtir phal a ni lo.

Naupangte tan bika din Special Juvenille Police Unit district tinah dah a ni a, anni chauhin naupang thil sual ti buaipui ngai leh venhim ngaite an khawih thei. Naupang kum 18 hnuai lam thil sual tite chungchang chu court pangngaiah ngaihtuah a ni ngai lo a, JJB-in an ngaihtuah ṭhin a; Child Welfare Committee-in kum 18 hnuai lam enkawl leh venhim ngai bikte chungchang an ngaihtuah ṭhin bawk.