Khawzawlah zirtirtu ṭha chawimawina hlân

Nimin khan Khawzawl bawrhsap Zothanmawia'n DC conference hall-ah District Level Teacher Award 2020 for Primary Section dawngtu, Rochungnunga Ralte, Rabung Primary School-I zirtirtu hnenah a hlân. Award 2020 hi Champhai district ṭhen hma anga kalpui a ni. 

Zothanmawia chuan, Khaw­zawl district aṭanga zirtirtu ṭha chawimawina dawng thei an awm chu ropui a tih thu a sawi a, "Zirtirtute hi mi ngaihsanawm leh Mizote pawhin kan ngaihsan an ni a, chhungkua an enkawl fel a, an fate pawh lehkhathiam tak takah an chhuah a, kohhran leh pawl hrang hrangah mi ṭangkai an ni," a ti a; zirtirtute'n an pawimawhna an hriat chian a, theihtawp chhuaha naupang an kaihhruai zel a ngaih thu a sawi.

Rochungnunga Ralte pawhin thu sawiin, award a dawng chu lawmawm a tih thu leh chonaa a ngaih thu a sawi a, ṭha zawka thawk zel turin theihtawp a chhuah zel dawn thu a sawi bawk. Award hian Rs. 5,000, thuchei leh memento a keng a ni.