Khawbungin minister an chawimawi

Minister of state Prof. Lalnilawma chu nimin khan a pianna Khawbung khawtlangin an khaw community hall-ah an chawimawi. Lalnilawma chuan, party sawi loa ram leh khawtlang hma­sawnna tur ngaihtuah chu Mizoram damna tur a nih thu a sawi.

Prof. Lalnilawma chuan, ZPM ministry-in Mizoram siamṭha turin theihtawp an chhuah mek nia sawiin, "Kan rawng­bawlsak mipui pawhin sorkar hmalakna leh ruahmannate a hlawhtlin theih nan theihtawp min chhuahpui turin kan ngen a ni," a ti.

Minister chuan, "Khawtlang hruaitute zingah party awmna inan loh vanga ram leh khawtlang hmasawnna tura sorkar ruahmanna leh hmalak-nate tikhaihlaktu leh tiṭhuanawptu awm lo se kan duh," a ti a; ram hmangaihna thinlung pu chunga ram hmasawnna atana thawhho a ṭul thu a sawi.

Prof. Lalnilawma chuan, Khawbung khawtlangin amah lawmpuina leh chawimawina hun an hmang chu ropui a tih thu leh an chhungkaw tana khawtlang ṭhatna chu an theihnghilh tawh dawn loh thu a sawi a; "Ram hmasawnna tura ministry-in hmalakna a neih mekah sorkar official-te'n theihtawpa sorkar hmalakna a hlawhtlin theihna tura ngaihtuahna an séng ṭhin hi a lawmawm. Kan ram siamṭha a, hmasawnna chhenfakawm kan neih theih nan sorkar hnathawkte an pawimawh hle a ni," a ti bawk.

Lalnilawma hian Khawbung khawtlang tan tarpauline, sprayer, grass cutter leh hlotúr eng emaw zat a pe a; nimin vek khan Hlakungpui Mualah fár thing a phun bakah, Khawbung BDO a tlawh a ni.