KHAWTHLIR

Veivah khap

Lawngtlai district magistrate Cheemala Siva Gopal Reddy chuan Indo-Bangladesh leh Indo-Myanmar ramri aṭanga km. 3 huam chhungah zan dar 6 aṭanga zing dar 6 inkarah veivah khap a nih thu a puang. Bawrhsap chuan, nimin khan Bangladesh ram chhung buaina thleng mek avangin thuchhuah a siam a, "Ran rual khalh luh emaw khalh chhuah phal a ni lo a, lirthei eng chi mah veivah phal a ni lo," a ti.

Kawng siamtute DC-in a nawr

Kolasib DC Robert C Lalhmangaiha hoin nimin khan NH-306 chhe zual laite chak zawka thawm ṭhat dan tur sawiho a ni. DC chuan, pawimawh hmasa - kawng khuar zual lai hnawh leh tawhsual tawh hlauhthawnawmnate thawm ṭhat zung zung a ṭul thu sawiin, VC-te nena thawhhona ṭha nei a, hun tiam chhunga zo tura ṭan la turin contractor-te a chah a; DC office aṭangin khauh zawka an nawr tur thu a sawi. Contractor-te chuan, quarry bula lung nawi (stone dust) te, kawng sira vantlang mipuite'n an hmanrua an dah ṭhinte leh an kawtkaia tui luankawr siam duh lo ṭhinte'n an hnathawh a tihharsat thu an sawi a ni.

Ruihhlo do sawiho

Hnahthial District Task Force on Ruihhlo Do chu nimin khan an chairman Rita Lalnunmawii Pachuau kaihhruaiin an ṭhukhawm a, ruihhlo do an sawiho. Hnahthial district ramri, a bik takin international border-a ruihhlo do pawl thawm ṭhat dan tur te, tlawmngai pawlte'n ruihhlo donaa an mamawh phuhrûk dan tur leh ruihhlo chungchang inzirtirna neih dan turte an ngaihtuah a ni.

Hostel hawng

Minister Lalthansanga chuan nimin khan a bial, Aizawl East-I chhunga Zemabawk Lungbialah Aizawl North College Girls Hostel sak thar a hawng. Hostel hi kum 2013-a UGC aṭanga sum hmuh hmanga sak a ni a, mi 20 awm theihna tur niin, thla khat awm man Rs 3,500 a ni. Minister chuan, hostel chu zirlaite tana zirna puitu pawimawh a nih a beisei thu a sawi.