Ran natna laka invendan tur sawiho

Kolasib District Level Committee on African Swine Fever & other Transboundary Animal Diseases (TADs) chu nimin khan an chairman, DC Dr H Lalthlangliana hoin an ṭhukhawm a, African Swine Fever leh ran natna ramri kaltlanga inkaidarh theih hrang hrangte ven dan tur an sawiho.

Dr H Lalthlangliana chuan ram dang leh state dang aṭanga vawk, vawksa leh vawksa aṭanga siam reng reng an district-a lakluh khapna thupek dinglai awm chu check gate-ahte khauh tak a kenkawh chhunzawm a nih tur thu sawiin, "African Swine Fever chungchanga mipuite hraittur pawimawhte chu a zau thei ang ber a inzirtirna kalpui a ṭul," a ti.

Kolasib DVO Dr Engkunga chuan African Swine Fever chu  Mizoramah engtik lai pawha lo lut ve thei reng a nih thu sawiin, "Covid-19 vanga ramri ven a nih avangin kan la him hram a, ramri hi uluk tak a ven chhunzawm a nih loh chuan ramri kaltlangin vawk lakluh aṭanga lo lut thei reng a ni," a ti a, vawk hri hi Assam, Arunachal Pradesh leh Meghalaya-ahte chuan a luh tawh thu a sawi.

Meeting-ah hian African Swine Fever chungchang inzirtirna neih dan tur work plan duan chu pawm a ni. African Swine Fever hlauhawmna leh invenna kalpui dan tur inzirtirna chu Kolasib district chhung, ramri dep a khaw 8-ah kalpui tura ruahman a ni.