Mipui Aw-ah zualkona 212 lut tawh

Sorkar hmalakna leh hnathawh dana lungawi lohna leh vuivaina mipuiin an thlenna tur 'Mipui Aw' website-ah nimin thleng khan zualkona (grievance) 212 a lut tawh a; Land Revenue and Settlement (LRS) department lakah grievance 19 lut tawhin a tam ber.

Mipui Aw (https://mipuiaw.mizoram.gov.in...)-ah hian grievance 212 a lut tawh a, chu'ng zinga 177 chu chinfel (tihtawp) tawh niin, buaipui mek 30 a awm. Grievance thehluhte chu a kaihhnawih sorkar department-te'n an chháng ṭhin. Chhànnate duhkhawp lo tan zualko nawn (appeal) theih a ni a, nimin thleng khan appeal pali zinga pathum chinfel a ni tawh.

Mipui Aw website-a department statistics aṭanga a lan danin, grievance dawng tam ber LRS department chuan 19 an dawng tawh a; Public Health Engineering department-in 17 dawng tawhin, Food, Civil Supplies and Consumer Affairs department, Power and Electricity department leh Mizoram Public Service Commission-te'n grievance 15 ṭheuh an dawng tawh bawk.

Sorkarin mipui tana hna a thawhna chung-changa lungawi lohna hian RTI Act kaihhnawih thil te, court rorel kaihhnawih thil te, sakhuana thil te, rawtna (suggestion) leh sorkar hnathawk kaihhnawih thilte a huam lo a ni.