ZPM leh BJP candidate-te'n nomination paper an thehlut

August 22, 2024-a Aizawl Municipal Corporation (AMC) Ward-VI by-election neih turah ZPM party candidate H Lalremtluanga leh BJP candidate Chawnghmingthanga te chuan nimin khan hming an pe lut.

ZPM candidate leh BJP candidate-te hian returning officer Mark Lalthanliana, Aizawl additional DC hnenah nomination paper an thehlut a; an party hruaitute'n an ṭawiawm.

AMC Ward-VI by-election chuh tura hming pek luh theih hun chu nimin chawhnu dar 3 khan a tâwp a; MNF candidate Lalrinfeli chuan August 7 khan hming a lo pe lut tawh a ni.

Ward-VI by-election-a nomination paper thehluhte chu vawiin hian endik a ni dawn a, August 12, 2024 chhun dar 1 thleng inhnuhdawh theih a ni ang.

AMC Ward-VI hian Chanmari West, Edenthar Veng leh Hunthar Vengte a huam a; corporator John Zosangliana chu March 21, 2024 khan a thi a, a hmun ruak hnawhkhat turin State Election Commission chuan by-election a buatsaih dawn a ni.

BJP, Mizoram Pradesh chuan AMC by-election-a an candidate tur hi nimin khan an pisaah an puang a, nimin vek khan nomination paper a thehlut nghal. BJP candidate tur Chawnghmingthanga hi Zarkawta cheng a ni.