Sangha mamawh zatve vel thar a ni

Kum khat chhungin mi pakhatin sangha kg. 11-13 vel ei anga ngaih a nih laiin, Mizoramah mi pakhat tan sangha kg. 6.4 vel zel thar ang a la ni a, mamawh zat aṭangin a zatve chauh Mizoramah thar a ni. Sangha Mizoram mamawh zat thar a nih theih nan ṭan la lehzual turin Governor-in Fisheries department hotute a chah.

Nimin khan Raj Bhavan-ah Governor Dr Hari Babu Kambhampati-a'n Fisheries department hotute a kâwm a; March 28, 2023-a a ṭhutkhawmpui tawh aṭanga tun thlenga Fisheries hmalakna thlirho a nih bakah, central scheme leh bank kaltlanga sangha vulhtute ṭanpui dan tur sawiho a ni.

Ṭhutkhawma tarlan danin, Fisheries department chuan Mizoramah ram hectare 24,000-a zau sangha dil siam theihna a awm angin an chhût a, mahse, hectare 4,000 vela zauah chauh sangha vulhtute'n hma an la mek.

Chhût danin, mi pakhatin kum khat chhungin sangha kg. 11 aṭanga kg. 13 inkar vel an ei tlangpuia ngaih a ni a; Mizoramah kum khat chhungin mi pakhat tan kg. 6.4 zel chauh thar a la ni. Mizoramah sangha mamawh zatve chauh thar a la ni a, a zatve emaw, a zatve aia tam mah chu state páwn lam aṭanga lak luh a ni.

Governor chuan Fisheries department hotute fuihin, "Mizo­ramin sangha thar tihpun a, kan eikhawp thar leh hralh chhuak thei tur khawpa tam thar thei turin Fisheries department-in nasa takin ṭan a lak a, project tam zawk central-ah a thehluh zung zung a ngai," a ti.

Dr Hari Babu Kambhampati chuan, "State sum dinhmunin a zir loh avanga Fisheries department-in budget a nei lian thei lo chung hian central sponsor scheme tam tak sangha vulhtute dâwm kanna leh tihhmasawnna tur a awm ṭeuh a ni," a ti a; Mizoramin sanghaa intodelh theihna a neih san thu a sawi.

Sangha vulhtute'n bank Loan an mamawh ṭhin tih sawiin Larsap chuan, sangha vulhtute zingah loan la duh lo an awm ṭhin chu zir chian a ṭul thu a sawi a, "Bank loan chungchang leh a rulh dan kalphungte chiangkuang taka an hriat loh vangte a ni thei," tiin, Fisheries department leh bank-te'n thawkhoa ṭan an lâk a ṭul thu a sawi a ni.

Inkawmhonaah hian Fisheries secretary H Lalengmawia'n tun hnaia Fisheries department hmalakna leh hlawhtlinna te, sorkar laipuia rawtna an thehluh te, hmalak dan tur leh ruahmannate a sawi a; Fisheries director Laltleipuii'n department hmalaknate a lem nen a sawifiah ve bawk.

Ṭhutkhawmah hian State Bank of India, Mizoram Rural Bank leh Mizoram Cooperative Apex Bank hotute an tel a; sangha khawitute hnena loan pek chhuah chungchang sawiho niin, bawhzuina atan Fisheries Secretary kaihhruaiin Fisheries department hotute leh bank hotute ṭhutkhawm ṭhin rawt a ni.