Dragon fruit zawrh chhuah rûnpui

Horticulture depart­ment leh Dragon Fruits Farmer Association hmalakna hnuaiah Greenwave Farmtech chuan Millennium Centre tualah nimin khan dragon fruit zawrh chhuah rûnpui, Dragon Fruits Extravaganza an buatsaih a, Horti­culture minister Prof. Lalnilawma'n a hawng.

Dragon Fruits Extravaganza-ah hian dragon fruit leh dragon fruit aṭanga siam chhuah thilte tlâwm zawka zawrh a ni a, home delivery pawh tih theih a ni.

Horticulture Minister chuan, Mizo thar thlai leh theite chu Mizote bawkin an hluta an chàwi lâr a ngaih thu sawiin, "A tihpun lamahte ngaihtuahna kan sèn tlân a ngai," a ti a; Greenwave Farmtech-in dragon fruit zawrh chhuah rûnpui an buatsaih chu fakawm a tih thu a sawi.

Prof. Lalnilawma chuan, Mizo tharte a hlutna tihpunna tur ngaihtuah a ngaih thu a sawi a, "Entrepreneur ṭhalai vengva tak takte'n ṭan an la zel ang a, sorkar nen theihtawpin kan ṭangho ang," a ti.