AMC Ward-VI by-election-ah hnehna kan chan ngei ka beisei - MNF Sr. VP

MNF senior vice president Dr R Lalthangliana chuan, Aizawl Municipal Corporation (AMC) Ward-VI by-election neih turah MNF leh Congress party thawk dun chuan hnehna sang tak an chan ngei a beisei thu a sawi.

Dr R Lalthangliana hian nimin zing khan Edenthar Vengah AMC Ward-VI chhunga MNF leh Congress unit-te by-election campaign/joint meeting a hmanpui a; LADC MDC by-election-ah MNF leh Congress thawkhoin hnehna sang tak an chang tih sawiin, "Tun AMC by-election-ah pawh party lian, ngêlnghet leh hlun tak pahnih thawhhona hi vote a pelhê loh chuan hnehna sang tak kan chan ngei ka beisei," a ti.

MNF leh Congress common candidate chhinchhiahna (symbol) hmeichhia leh mipa inkai lai a nih thu sawiin R Lalthangliana chuan, "Hei hian thui tak entir a neih ka ring. Nikuma MLA general election-ah khan party en loin, a mihring pawh en chuang loin ZPM symbol ngawr ngawr kha enin mipuiin an thlang tling mai a ni. Eng inthlanah pawh khatiang boruak ringawt kha chu a thlen nawn ka ring tawh lo," a ti a; an candidate, corporator thi ta John Zosangliana Ralte nupui Lalrinfeli chu thlang tling turin Ward-VI mipui a sáwm.

MNF Senior Vice President chuan, Congress leh MNF ten lungrual taka an thawhho theih avang leh Ward-VI bial joint campaign committee-te ṭhahnemngaihna leh lungrualnaah a lawm thu a sawi a; Congress leh MNF common candidate chu a campaign-naah mipui duhthusam ang diak diakin a pha lo a nih pawhin lusûn khawhar hlim a ni tih hrethiam turin bial mipui a ngen bawk.