MZP leh ICNCC hruaitute inkâwm

MZP General Headquarters hruaitute chuan August 7, Nilaini khan an pisaah Interim Chin National Consultative Council (ICNCC) hruaitute an kâwm. Inkawmhona hi MZP president H Lalthianghlima'n a kaihruai a; Myanmar rama Chin state chhunga Zo hnahthlak hnam hrang hrang inkarah inpumkhatna leh thawhhona ṭha a awm theih nana hmalakho dan tur an sawiho a ni.

MZP chuan, "Chin state chhunga Zo fa hnam hrang hrang inkarah innghirnghona awm mek hi ṭha a ti lo," tiin, thawhhona ṭha a awm theih nan ICNCC hruaitute an kawm tih an tarlang a; hun remchang hmasaah Chinland Council leh Chin Brotherhood bakah, pawl dangte an kawm leh dawn thu an tarlang.

Chin state chhunga Zo hnahthlakte inkarah inremna a awm theih nan hmalak ṭha an ti tih sawiin MZP chuan, "Unau leh unau karah policy inang lo mah se, tharum thawh loh ni se tih te, remna a awm theih nan hmalak chhunzawm leh Myanmar rama remna leh mipui sorkar a din theih nana theih ang anga thawhho ni se tihte rilru inhmu taka sawiho a ni," an ti.