MLA fund zatve pek chhuah ZPM party-in lawmawm an ti

ZPM party chuan thuchhuah siamin, ZPM kaihhruai sorkarin MLA-te hnenah MLA fund zatve, cheng nuai 100 ṭheuh ṭum khata a pe chhuak chu lawmawm an tih thu a tarlang.

ZPM chuan, sorkar hun dangah chuan MLA fund chu tlem tê têin vawi li tea pek chhuah ṭhin a nih thu sawiin, "MLA leh bial mipui tan hmasawnna hna tak tak thawh dawnin a buaithlak ṭhin hle. Kalphung thar sorkarah MLA 40-te'n cheng nuai 100 ṭheuha an chan tur cheng vbc. 40 pek chhuah a ni hi sorkarin hmasawnna hna thawh a taka a ngaihtuahzia a lang chiang hle a ni," an ti.

MLA Local Area Development scheme chu MLA-te'n an bial chhung an cheina tur leh bial mipui tihhmasawnna tur a nih thu sawiin ZPM chuan, "Sorkar tharin a ngai pawimawh hle. MLA fund pawh kum khata cheng nuai 150 ni ṭhin chu nuai 200-ah tihpun a lo ni tawh a ni," an ti a; MLA fund zatve ṭum khata pek chhuah chuan MLA 40-te tan an biala hmasawnna hna thawhnaah kawngro a sut ngei an beisei thu an sawi.

ZPM party chuan, "Sum enkawl kawnga a ngaihna hria chief minister Lalduhoma, Finance minister ni bawk leh adviser to CM i/c Planning & Finance TBC Lalvenchhûnga te bakah, Planning & Programme Implementation department-a thawktute kan chhuangin an chungah lawmthu kan sawi a ni," an ti.