Khawzawlah thil pawimawh sawiho

Khawzawl district bawrhsap K Vanlalṭhiana hoin nimin khan a pisaah District Committee on Swachhata Green Leaf Rating leh District Water and Sanitation Mission an ṭhukhawm a, hmalakna tur hrang hrang an sawiho.

Swachhata Green Leaf Rating hi khaw hrang hranga sorkar/mimal enkawl thlen-in leh inthiarna hmunhma neite thianghlim taka vawngte hnenah pek theih a ni a, sorkarin standard a siam hmanga endik tur a ni. Khawzawl district-ah August 1, 2024 aṭanga October 15, 2024 thleng roll-out phase kalpui a ni ang. Ṭhutkhawmah hian rating pek dan tur leh a petu tur committee siam an rél.

Nimin veka Khawzawl DC hoa District Water and Sanitation Mission ṭhukhawm chuan kumin July 1 aṭanga August 31, 2024 chhunga kalpui tur Stop Diarrhoea Campaign chungchang an sawiho bawk a; department hrang hrangte'n mawhphurhna an insem nghal a ni.