KHAWTHLIR

Gas company hotu leh CM inkâwm

Chief minister Lalduhoma chu nimin khan a pisaah Tripura Natural Gas Company Limited managing director Pralay Patra nen an inkâwm. Pralay Patra chuan, Mizoramah compressed natural gas (CNG) filling station din an duh thu a sawi a; hemi chungchangah hian CM chuan Food, Civil Supplies & Consumers Affairs Minister leh Secretary-te hmu turin a lo ràwn a, Mizorama hmalak an tum dan tlangpui ziaka thehlut turin a chah bawk.

VC-te'n tlawh

Mamit Joint Village Council member-te chuan nimin khan Mamit District Hub for Empowerment of Women huaihawtin hleilenna tuartute leh hmeichhe baihvaite tlukluhna in, One Stop Centre leh Shakti Sadan an tlawh. He hun hi khawtlang hruaitute'n One Stop Centre leh Shakti Sadan-te chiang zawka an hriat theihna tur leh thawhhona ṭha zawk a awm theihna tura buatsaih a ni.

Project thlirho

Chief minister Lalduhoma hoin nimin khan sorkar hotute'n CMO conference hall-ah Mizoramin externally aided project a kalpui mek leh kalpui turte an sawiho. Project kal mek bawhzui dan tur te, Department of Economic Affairs-in loan pûk theih zat a bituk chhunga insiamrem dan tur te, project thehluh tura duan Council of Minister-in a ngaihtuah hmabak la awmte thlirho a ni.

Lawmawm an ti

ZPM Upa Committee chuan thuchhuah siamin, minister B Lalchhanzova enkawl FCSCA department leh Land Revenue & Settlement department-ah hmasawnna tam tak a thleng mek nia sawiin, lawmawm an tih thu an tarlang. Ram LSC leh pass-te awlsam leh chak zawka siam a nih theihna tura Aizawl district chu hmun hnih - North leh South-a ṭhen a ni dawn leh surveyor lak a ni tur chu lawmawm an tih thu leh, a hmalakna dangte chu lawmawm an tih thu an tarlang a ni.