Saitualah Handloom Expo buatsaih

Nimin khan Saitual Bazarah ni thum awh tur Saitual Special Handloom Expo 2020 buatsaih a ni a, bialtu MLA R Lalzirliana, minister-in a hawng.

R Lalzirliana chuan, Saitual­ah Handloom Expo 2020 hmasa ber nghah a ni chu lawmawm a tih thu sawiin, "Sorkarin ZOHANDCO a tihnun thar leh tâkah chuan a thawktute tun hma aia taima zawka inbuatsaih a, mipui leh sorkar tan ṭha­hnemngai taka an thawh zel ka beisei," a ti a; pi leh pûte kutchhuak pawnpui, puankawp, bawhtah kawr leh thil dang eng emaw zat hmuh tur awm tawh lote chu thar­thawh leh turin puantahtute a ngen.

Handloom Expo 2020 hi Development Commissioner for Handlooms, Ministry of Textiles bultumin National Handloom Development Prog­ramme (NHDP) hnuai­ah Mizoram Handloom & Handicraft Development Corporation Ltd. (ZOHANDCO)-in an buatsaih a ni a, February 12-15 chhung neih a ni ang. Mi 22-in an kut­chhuak chi hrang hrang an pho chhuak a ni.