Sorkar laipui aiawhin Bru tlawh Harsatna an neihte a zawtfiah

Ministry of Home Affairs-a joint secretary, hmarchhak bial enkawltu Satyandra Garg chuan July 2, 2016 khan Tripura aṭanga Mizoram Bru lo kir, Mamit district khaw ṭhenkhata awmte a tlawh.

Thu dawn danin Satyandra Garg hian Aizawl aṭangin helicopter-in Mamit district a pan a; Suarhliap leh Damdiai khua a tlawh. Khaw pahnihah hian Tripura Relief camp aṭanga Bru mi ṭhenkhat, anmahni duh thua Mizorama kirte dinhmun a enfiah a, harsatna an tawhte a zawt.

Bru-te chuan Home Joint Secretary hnenah hian an harsatna leh an duhte an lo thlen a; chu'ng zingah chuan an awmna ṭhin khuaa ramte chu mimalin an lo neih tawh avanga ram pek an duh thu te, sorkar laipui aṭanga chhawmdawlna pek tura tih chu tihpun an duh thute a tel. Bru pawl hruaitute chuan, khawtlang mipuite nen an chenhona leh khawsak kawnga harsatna lam an sawi lo.

Satyandra Garg chuan, Bru-te thil lo thlen zinga kawlphetha leh tui thinghlim in tur pekte chu tihhlawhtlin dan kawng zawn a nih tur thu a sawi.

MHA Joint Secretary lo dawngsawngtu, Bru Coordination Committee (BCC) chairman Elvis Chorkhy chuan, Satyendra Garg chuan Monitoring Commit-tee-te'n Bru-te harsatna tawhte leh a sutkian dan turte a buaipui tur thu a sawi tih a sawi.

Elvis Chorky chuan, BCC-in memorandum an lo pe tih sawiin, Special Development Programme din a nih theih nana hma la turin an ngen tih a sawi a, "Zirnaah kan hnufual avangin Bru area-ah Central school din turin kan lo ngen bawk," a ti.

MHA Joint Secretary hi Ai-zawl aṭangin Home department additional secretary Lalbiakzama leh OSD David H Lalthangliana ten an ṭawiawm a, Mamit aṭangin DC Lalbiaksangi'n a ṭawiawm bawk. Tlawh an tum zinga mi Saikhawthlir erawh chu harsatna a awm avangin an tlawh thei lo a ni.

Satyendra Garg hian June, 2016 khan Tripura-a Bru refugee camp a tlawh a; Mizoram mite chu hruai kîr hna thawh leh hun hmasa berah Mizorama kîr vek turin a chah.

Satyendra Garg chuan, Bru-te Mizorama hruai kîr turin rua-hmanna kalpui mek a nih tih sawiin, "Repatriation kalpui tur hi sorkar laipui, Mizoram sorkar leh Tripura sorkar ṭangrualin ṭha taka kalpui tum a ni a, tun ṭuma lêt lote chu engtikah nge hruai kîr hna thawh a nih leh ang tih sawi theih a nih loh avangin Mizoram khua leh tuite chu lêt vek ang che u," a ti.

Mizoram Bru Displaces Peo-ple’s Forum (MBDPF) hruaitute chuan Satyendra Garg hnenah hian Mizorama lêt lehte tan ram pek an nih loh thu te, lo tur hectare 5 tal pek an duh thu te, buhfai free ration kum hnih chhunga pek ṭhin chu kum li tala pawhsei an duh thu te, Mizorama an kîr hunah a hlâwm deuha dah khawm an duh thu te, sum faia ṭanpuina an dawn chu tihpun an duh thu leh, an harsatna ngaihtuah tur committee din an duh thute an thlen.