KHAWTHLIR

Health Sunday & Hospital Sunday

Mizoram Presbyterian Kohhran chuan nimin khan Health Sunday & Hospital Sunday an hmang. Health Sunday pualin chawhnu inkhawmah hun hman niin, thupui chu 'Zun-thlum' tih a ni a; zanah Hospital Sunday puala hun hman niin, thupui chu 'Damna kim Isua' tih a ni a, thawhlawmte chu Synod Hospital puala pek tur a ni. Mizoram Synod hian kum 1928-ah Hospital Sunday hmang ṭanin, kum 1988-ah Health Sunday an hmang ṭan a; heng ni pahnihte hi kum 2010 aṭangin ni thuhmunah an hmang kawp ṭan a ni.

Thisen pe

Inrinni khan Salvation Army Youth Serchhip CO bialte chuan, Salvation Army Founders Day pualin Serchhip Hospital tan thisen unit 34 an pe a, a petute mipa 26 leh hmeichhia pariat an ni. Salem Veng Branch KṬP pawhin Aizawl Civil Hospital tan thisen unit 30 an pe a, a petute mipa 26 leh hmeichhia pali an ni.

In kâng ral

Sihhmuia Lalṭanpuii te in chu July 1, 2016 zan dar 11:30 vel khan a kâng ral a, bungrua an chuh hman lo. Sihhmui Branch YMA chuan Inrinni khan hnatlang-in chhawmdawl hna an thawk a, in kang an senghawi bakah in thar an saksak nghal a ni.

Missionary Sunday

Baptist Church of Mizoram chuan nimin khan 'Missionary Sunday' an hmang. Missionary Day hi BCM tualchhung kohhran hrang hrangte'n an hmang a, thupui chu "Kohhran leh Chamchin Ṭha hril' tih a ni. BCM hian Missionary Day hi kum 1944-ah an hmang ṭan a, July thlaa Pathianni hmasa berah an hmang ṭhin.

AMC kutah dah

Economics & Statistics department-in Aizawl khawpui chhunga nau piang chhinchhiahna, Registration of Birth leh mitthi chhinchhiahna, Registration of Death a buaipui ṭhin chu July 2016 aṭangin Aizawl Municipal Corporation (AMC) kutah a hlan. Economics & Statistics department chuan July 1, 2016 khan hriattirna chhuahin, Aizawla nau piang leh mitthi chhin-chhiah turah AMC dàwr tawh turin mipuite an hriattir a ni.