Hawla thu sawi an ring lo: Zoramthanga

MNF president Zoramthanga chuan, tun hnaiah chief minister Lal Thanhawla'n, 'Synod tih loh kohhran dangte'n zu zawrh an do tak tak lo' nia a sawi chu a sawitu leh Congress party mite pawhin an ring lo niin a sawi a, "Keiin ka chhanna chu, Congress hruaitute hian an hotupa hi zilh deuh hlek se ka ti a ni," a ti.

July 2, 2016-a Falkland Venga MNF-in mi thar lawm luhna an buatsaihah thu sawiin, Zoramthanga chuan, "Congress sorkar hi development-ah a châwl ṭhuap a. Sorkar hnathawk zawng zawngin an ning tawh hle a, zirlai pawl hrang hrangte an lungawi lo a, zu zawrh vangin kohhran an thinrim hle bawk a, mipui pawhin an kham tawh hle a ni," a ti a; inthlan leh hunah MNF-in sorkarna an siam ngei dawn niin a sawi.

AMC mayor PC Lalhmingthanga pawhin thu sawiin, mi tinin political party zawm turin duhthlanna felfai tak an nei tih a sawi a, "Mizo tak leh Kristian taka politics khelh hi ṭha ka ti a, chu chu MNF rilru a a ni a, kan Pathian duh dan pawh a ni. India politics hi chu kan Mizo rilru nen a inmil lo a ni," a ti.

MNF thuchhuah chuan, Falkland Venga lawh luhna inkhawmah hian MNF President chuan party hrang hrang aṭangin MNF zawm thar mi 117 a lawm lut a, lawm luh zingah hian local council member Dorothy Lalhruai-tluangi, ZNP mi pawh a tel niin an tarlang.