CM-in June 27-ah PM Modi sawmna a thawn

June 30, 2016-a Lammuala Remna Ni lawmnaa khuallian tura sawm prime minister Narendra Modi chu chief minister Lal Thanhawla'n June 27, 2016-ah ziakin sawmna lehkha a thawn nia thu dawn a ni.

Central YMA kaihhruaina hnuaia Lammuala Remna Ni lawmnaa khuallian tura Prime Minister sawm chungcangah, sawi neuh neuh a awm a; ṭhen-
khat-in CM Lal Thanhawla'n ziakin sawmna a thawn lo nia an sawi laiin, ṭhenkhat chuan sawmna a thawn niin an sawi thung.

Chief Minister's Office (CMO) aṭanga thu dawn danin, Remna Ni celebration Organising Committee aṭangin CM Lal Thanhawla'n June 23-ah Prime Minister hnena sâwmna lehkha thawn tura ngenna a dawng a; Chief Minister chuan June 27-ah ziakin sawmna a thawn a ni.

Chief Minister-in ziaka sawmna a thawnah hian heti hian a inziak: "I hriat tawh tho ang-in, Mizo mipuite tawrhna sawi-fiah rual loh titawptu leh boruak muanawm leh hmasawn-na thlentu Mizoram Peace Accord ziah aṭangin kum 30 a ni leh ta a. Inremna ziah a nih aṭang khan political party hrang hrang, NGO hrang hrang, etc. te chuan anmahni remchan dan ang zelin an lawm ṭheuh ṭhin. Kohhran hrang hrang inzawm khawmin ṭum khat chu a lawmna siamin political party leh NGO hrang hrangte an sawm bawk.

"Kumin Remna Ni kum 30-na hi mipui vantlang huapzo takin YMA hmalakna hnuaia din Remna Ni Celebration Committee bultuma lawm tum a ni a. Committee chuan he hunah hian khuallian turin an sawm che tih min hriattir a, kan state mipuite tan leh keima tan tak pawh a ni ang, he hun remchanga hmanga kan state rawn tlawh a, he lawmna ni hlimawm takah hian lo tel ve turin ka sawm a che," tiin.

Prime Minister sawm leh sawm loh chungchangah BJP Mizoram State president Prof. JV Hluna chuan zawhna chhangin, "June 23, 2016 thleng kha chuan CM-in a sawmna hi PM office a la thleng lo. June 12 khan CYMA President hnenah PM hi state programme-ah chuan CM-in an sawm tur a nih thu leh an sàwm loh chuan a kal ngai loh thu ka hrilh a, CM-in a sawm tawh thu min lo hrilh. A tûk, June 13-ah chuan PM chu Allahabad ah kan zawt leh a, PM chuan sawmna a la hmuh loh thu a sawi," a ti.

Prof. JV Hluna chuan, Aizawla a haw hnuah PM sawmna chu a bawhzui a, CM Lal Thanhawla chuan lehkhain a la sawm lo a, ṭawngka chauha a sawm thu a hria tih a sawi a; CYMA hruaitute chu ziaka sâwm tura CM ngen tura a ràwn thu a sawi.

Central YMA president Lal-biakzuala sawi danin, Organising Committee-in May 18, 2016-ah fax-in PM office-ah sawmna thawn a ni a, a hnuah CYMA Vice President leh Finance Secretary-te Delhi-ah an zuk kal. May 28, 2016-ah Shillong-a NEC Plenary Session-ah CM Lal Thanhawla chuan PM chu ṭawngkáin a sawm a; chumi hnuah MNF President ;eh BJP President ten PMO-ah sawmna lehkha an thawn ve leh bawk.