Buhfai bûk tling lo chungchang sawiho

Food, Civil Supplies & Consumer Affairs department, Legal Metrology, Mizoram Truck Drivers Association, Kolasib Retailer Association leh Kolasib District MJA-te chu July 1, 2016 khan an ṭhukhawm a; Kolasib-a retailer ṭhenkhat leh mipuite'n ration buhfai an lakah bûk tling lo a awm ṭhin nia sawi an sawiho.

Kolasib-a FCSCA additional DCSO H Lalluaia chuan, kudam hrang hrangah tihdan phung inang lo mah se, mipui leh retailer-te tihlawm chu an tum ber a nih thu a sawi a; retailer-te zingah buhfai ip 2/3 an bûk chuan loh chuan heka inngai tlat leh kudam aṭanga pek chhuah tur buhfai bûk tur ngaihtuah loa buhfai ṭha thlang reng renga hun hmang an awm ṭhin nia sawiin, pawi a tih thu a sawi.

H Lalluaia chuan, tun hnuah chuan mipui tan harsatna a awm tawh loh nan retailer-te'n buhfai pek chhuah chhung a rei lohna tura buhfai pek chhuahte bùktir loa an lak mai ṭhin chu tihtawp a nih tur thu a sawi a; kudam
aṭanga retailer-te hnena buhfai pek chhuah tur reng reng chu bûk vek a nih tawh tur thu a sawi bawk.

Inkawmnaah hian truck driver-te chuan Rengtekawn FCI kudam aṭanga buhfai an lakte chu a bûk dik takin FCSCA kudamah an thlen
ṭhin niin an sawi a; kudam enkawltute pawhin retailer-te duh dan angin buhfai bûk kher loin an pe chhuak mai ṭhin tih an sawi. Retailer ṭhenkhat chuan bûk loa kudam aṭanga buhfai an lak chhuah ṭhenkhat chu bûk a tling lo niin an sawi ve thung.

Inkawm zawhah buhfai ip eng emaw zat chu bûk chhin nghal a ni a, kg. 50 aia rit leh tling lo a awm nual a ni.